Efesionan:

Kon Sigui Hesus den Tempunan Difísil

Den e Epestel na e Efesionan, Pablo ta konta nos tokante e Efesionan mes. Añanan despues di e eventonan eksitante di e promé dianan di mishon kristian Na Efeso, e Efesionan tabata lucha ku e nifikashon di nan fe kristian.

Pablo, un tempu e bruhadó di kos di e ekonomia di e siudat di kuater mas grandi den e imperio romano, awor ta marginá i enkarselá. Skirbiendo for di prizòn, e ta preokupá ku e kreyentenan na Efeso por “pèrdè ánimo”, lubidando kualke sentido aktivo di loke ta nifiká di ta disipelnan di Hesus den e kultura sofistiká, síviko, i profundamente pagano di Efeso. Aunke su oyentenan ta kristiannan kaba, Pablo su tono ta unu di rekrutamentu. E ta trata na inskribí nan di nobo den fe kristian, di bolbe sende e kandela di nan deboshon na Kristu, i pa resusitá e eksitashon di ta parti di Dios su gran empresa den mundu, e iglesia.

Pa motibu ku e fe kristian ta trata di Kristu, Pablo ta radia atmirashon i adorashon di djE. Si disipelnan kristian indesiso mester rekuperá nan posishon, lo ta pasobra nan ta rekobrá nan promé amor pa Hesus i establesé konfiansa fresku den Su grasia i poder. Asina Pablo ta enfatisá Kristu su eksaltashon den shelu, riba tur e podernan i deidatnan ku ta trata na atraé e deboshon di kreyentenan na Efeso. Hesus ta e meta di e plan divino pa e siglonan, un plan den kua kreyentenan, manera e iglesia, ta hunga un ròl importante den Dios su plannan pa unifiká tur kos den Kristu.

Miéntras Pablo ta buska pa hala kreyentenan na Efeso den deboshon fresku na nan Señor, e no ta minimisá e demandanan di disipulado kristian. E ta splika ku poko detaye kon komportashon i komunidat kristian ta. Kristiannan ta yamá na adorashon inspirá pa e Spiritu, ku ta honra Kristu, i ku ta dirigí riba Dios, loke Pablo ta ilustrá bes tras bes. Un deboshon na Kristu ta impaktá kon un hende ta aktua i papia. Stima Kristu ta nifiká respetá i balorá kompañeronan kreyente. E ta nifiká resistí e patronchinan di komportashon falsu i seksualmente dekadente ku ta asina komun den nan kultura. E ta nifiká, den nos relashon denter di iglesia i hogar, fia for di e ehèmpel di outosakrifisio ofresé pa Kristu. E ta nifiká ofresé konsiudadanonan di Efeso ehèmpelnan kla di un patronchi nobo di eksistensia humano.

Pablo ta dediká un bon parti di su karta ekspresando su eksitashon pa e patronchi nobo akí di loke ta nifiká pa ta humano a traves di miembresia den e iglesia di Dios. Spesialmente e pensamentu ku Dios a uni segmentonan distansiá di humanidat, hudiu i pagano, komo un den e iglesia, ta stimul’é. Ora nan biba unidat kaminda ta spera hostilidat, nan tin un oportunidat pa ekshibí e karakterístikanan di Dios su sosiedat nobo i e reino benidero.

Den su búskeda di e importansia di ta parti di e iglesia di Dios, Pablo ta desaroyá kuater metáfora pa e iglesia. Kreyentenan ta forma e kurpa di Kristu, demostrando nan deboshon na Kristu i nan unidat ku otro. Nan ta un tèmpel bibu, trahá a traves di e sakrifisio di Kristu riba Kalvario, den kua ta adorá Dios. Nan ta e brùit di Kristu, ku ta mira na un gran seremonia di matrimonio ora e Brùidehòm bin pa reklamá nan komo di djE. Den un último metáfora ku ta ekspresá Pablo su esfuersonan pa bolbe inskribí nan den fe kristian, nan ta e ehérsito di Kristu, ku ta hasi pas den Su nòmber, kombatiendo e forsanan di skuridat den e forsa di Dios miéntras nan ta wak na e regreso di Kristu.

Efesionan, anto, ta papia spesialmente na tempunan manera di nos mes den kua e enkanto di mundu i e pasamentu di tempu ta hasi disipulado kristian laf. E ta halsa Kristu i asentuá e nifikashon di siguiE komo miembronan envolví i aktivo di Su iglesia miéntras nos ta biba e speransa di Su regreso. E trimèster akí nos tin e privilegio di skucha, ku orashon, na Efesionan i eksperensiá di nobo e eksitashon di sigui Hesus den tempunan desafiante.